ESCOLA TÉCNICA VOCACIONAL DOM BOSCO FATUMACA, BAUCAU – TIMOR LESTE

by: Amilcar C. D’Silva, sdb Escola Técnica Vocacional de Dom Bosco – Fatumaca nudar instituisaun edukasaun formal a nivel secundaria iha area teknika professional nian. Escola ida nee situa entre aldeia WaibeheAna no Cairiri, Suco Gariuai, Municipio Baucau. Na’in no jerente ba instituisaun ida nee mak Kongregasaun Salesiano de Dom Bosco iha Timor Leste. Instituisaun ida nee, hahu fornese edukasaun téknika profissional husi tinan 1973-1974 ho pionero sira mak Salesiano missionario sira husi Italia no Portugal. Fundador principal ba Escola ida nee mak Irmaun Carlos Gamba SDB – salesiano missionario husi Italia. Iha tinan neba, hahu ho kurso rua: Marcenaria no Mecanica. Husi tinan 1977-1983, iha tempo okupasaun Indonesia nian, instituisaun ida nee hanaran “Sekolah Teknik (ST)”. Husi tinan 1983-2002, instituisaun nee konhesidu nudar “Sekolah Teknik Menengah (STM)” ho kurso haat: Marcenaria, Mecanica, Electricidade no Electronica. No iha tempo ukun rasik- an nian hetan titlu official nudar Escola Técnica Vocacional (ETV) de Dom Bosco Fatumaca. Hori-uluk to’o mai ohin-loron, ETV Dom Bosco Fatumaca kontribui ona tekniko professional barak ba sociedade no dezenvolvimento nasaun ida nee. Escola ida nee oferese kurso haat:

1. Marcenaria
2. Mecanica Produsaun
3. Electricidade
4. Electronica

 

 

 

  Total alunos iha ETV Dom Bosco Fatumaca ba tinan nee 2015 mak 246. Kada kurso aluno hamutuk 21 iha kada klase. Escola nee mos hahu ona loke fatin ba estudante feto sira atu mai estuda; hahu husi tinan 2009. Kada tinan escolastica aloka fatin rua ba estudante feto iha kada kurso baseia ba valor teste (entrance test). Prosesu selesaun ba estudante sira nebe atu mai halo aprendizagem iha escola ida nee baseia ba valor teste nian. Tuir dados escola nian, kada tinan número registo atu tuir teste mais de 400. Tinan nee (2015) número registo ba teste hamutuk 405. Kada tinan, escola selesiona deit 84 alunos ba Ano Letivo foun. Konkorente (estudante) sira nebe tuir teste mai husi escola pre-secundaria sira iha teritorio (Munisipio 13) Timor Leste nian. Atividade aprendizagem iha ETV Dom Bosco Fatumaca halao loron tomak husi 07.45 – 17.00horas husi Segunda too Sábado. Atividade aprendizagem nee fahe ba sessaun rua:

1. Sessaun teória nian hahu husi 07.45 – 14.15horas.
2. Sessaun prátika oficina hahu husi 14.15 – 17.00horas.

Iha sessaun teória nian, estudante sira haklean sira nia matenek hodi aprende materia geral no materia especializasaun. Materia geral sira mak hanesan lingua, materia exata, social no economia, moral no relijiaun. Materia especializasaun mak nudar centro ba sira nia aprendizagem tuir kurso nebe estudante ida-idak hili. Iha sessaun prátika oficina mak tempo no fatin iha nebe estudante sira aplika sira nia konhesimentu téknika nebe sira hetan iha sessaun teória nian. Durante horas prátika oficina nian mestre/instructor sira asiste, fo instrutusaun téknika no avaliasaun ba estudante ida-ida atu pratika tuir exercisio nebe trasa ona iha kurso ida-idak. Iha instructor ida/rua mak fo assistensia ba estudante sira (21 estudantes) kada klase ida iha kurso ida-idak. Atu hetan tan informasaun; clique ba:

 https://www.youtube.com/watch?v=62H3pMGW05o https://www.youtube.com/watch?v=DpXWCpJ9FMs

  Fasilidade Escola nian ba tinan 2015 hodi suporta atividade aprendizagem mak hanesan tuir mai nee:

1. Sala de aprendizagem hamutuk 12.
2. Sala desenho 2.
3. Prédio (gedung) 4 ba prátika oficina (oficina Marcenaria, Mecanica, Electricidade no Electronica).
4. Biblioteka 1.
5. Sala computador 1 ba estudante sira atu aprende Microsoft Office Package no AutoCad.
6. Salaun 1 (multipurpose hall).
7. Domitorio 2 (fatin-toba nian) ba aluno internato sira.
8. Refetorio 1 (fatin-han nian) ba estudante sira.
9. Campo: football 1, basketball 2, volleyball 1, mini-football 1.
10. Igreja Santuario de Maria Auxiliadora dos Cristãos.

 

 

 

 

 

  Atu hetan informasaun bele mai vizita Colégio Dom Bosco – Fatumaca, Baucau, Timor Leste. Ka kontaktu ho:

• Adriano Maria de Jesus, SDB – Director da ETV Dom Bosco Fatumaca (no hp: +670 77361826)
• Rui Gomes, SDB – vice Director da ETV Dom Bosco Fatumaca (no hp: +670 77814092).